കൊച്ചി : ചേരാനല്ലൂര്‍ വാഹനാപകടത്തില്‍ മരിച്ച ജയബാലകൃഷണന്‍റെ മകള്‍ ഭദ്രകീര്‍ത്തി ക്രൈംബ്രാഞ്ച് ഓഫീസിലെത്തി മൊഴി നല്‍കി. പതിനേഴുകാരന്‍റെ പിതാവായ അഡീഷണല്‍ ജില്ലാ ജഡ്ജി തെളിവ് നശിപ്പിച്ചു എന്ന പരാതിയിലാണ് ഭദ്രകീര്‍ത്തി മൊഴി നല്‍കിയത്. ജഡ്ജിക്കെതിരെ ബിഎന്‍എസ് 238 വകുപ്പ് പ്രകാരം കുറ്റം ചുമത്തിയിരുന്നു.
അപകടം നടന്ന സ്ഥലത്ത് ജഡ്ജിയുടെ അസാധാരണമായ സാന്നിധ്യവും പൊലിസ് സ്റ്റേഷനിലെ ഇടപെടലുകളും തെളിവു നശിപ്പിക്കാനും കേസ് അട്ടിമറിക്കാനുമായുള്ള ശ്രമമാണെന്ന് കാണിച്ചായിരുന്നു ഭദ്രകീര്‍ത്തി പരാതി നല്‍കിയത്.
അപകട സമയത്ത് വാഹനത്തില്‍ ഉണ്ടായിരുന്ന ജഡ്ജി എന്നെഴുതിയ ബോര്‍ഡ് അഴിച്ചുമാറ്റിയെന്നതും ഉദ്യോഗസ്ഥരെ സ്വാധീനിച്ചെന്നതും അന്വേഷിക്കണമെന്നും പരാതിയില്‍ ആവശ്യപ്പെട്ടിരുന്നു. അതേസമയം, ജഡ്ജിയുടെ മുന്‍കൂര്‍ ജാമ്യാപേക്ഷ നാളെ ഹൈക്കോടതി പരിഗണിക്കും.
പതിനേഴുകാരന്‍റെ വ്യക്തിവിവരങ്ങൾ പ്രചരിപ്പിച്ചവർക്കെതിരേ കേസ്
കൊച്ചി: ചേരാനെല്ലൂര്‍ വാഹനാപകടക്കേസില്‍ 17 കാരന്‍റെ ദൃശ്യങ്ങളും വ്യക്തിവിവരങ്ങളും സമൂഹമാധ്യമങ്ങളിലൂടെ പ്രചരിപ്പിച്ചവര്‍ക്കെതിരേ കൊച്ചി സിറ്റി സൈബര്‍ പൊലിസ് കേസെടുത്തു. സമൂഹമാധ്യമങ്ങളിലെ 16 യൂസര്‍ ഐഡികള്‍ക്ക് എതിരേയാണു കേസ്.
ജുവനൈല്‍ ജസ്റ്റീസ് ആക്ട് സെക്‌ഷന്‍ 74 (കുട്ടികളുടെ വിവരങ്ങള്‍ വെളിപ്പെടുത്തുന്നത് തടയല്‍), ഭാരതീയ ന്യായ സംഹിതയിലെ ക്രിമിനല്‍ ഭീഷണിപ്പെടുത്തലുമായി ബന്ധപ്പെട്ട വകുപ്പുകള്‍ എന്നിവ പ്രകാരമാണ് ഓണ്‍ലൈന്‍ ചാനലുകള്‍ക്കും ഇന്‍ഫ്ലുവന്‍സര്‍മാര്‍ക്കുമെതിരേ കേസെടുത്തിട്ടുള്ളത്.
കോടതി നിര്‍ദേശത്തെത്തുടര്‍ന്നാണ് പൊലിസ് നടപടി. അക്കൗണ്ടുകള്‍ കണ്ടെത്താനുള്ള നടപടികള്‍ ആരംഭിച്ചു. പ്രായപൂര്‍ത്തിയാകാത്തവരുടെ പേരുവിവരങ്ങള്‍ വെളിപ്പെടുത്തുന്നത് രണ്ടു വര്‍ഷം വരെ തടവുശിക്ഷ ലഭിക്കാവുന്ന കുറ്റമാണ്.
